Qırımtatarlarnıñ 1944 senesi sürgünligi taqiq etilmekte, bunıñ neticesi ise qırımtatar halqı genotsidiniñ tanılması olmaq kerek. Böyle bir fikirni Qırım.Aqiqat Radiosınıñ saba yayınında Qırım Muhtar Cumhuriyetiniñ prokuror muavini Nikolay İvanets seslendirdi.
«Deliller toplanğan soñ tarihiy-demografik ekspertiza belgilenecektir. Aynı ekspertiza ukrain halqınıñ genotsidinen bağlı cinaiy iş boyunca keçirilgen edi, şimdi ise 1944 senesi olğanlar faal sürette taqiq etile», – dedi o.
Yayınnıñ diger musafiri – «Qırımtatar maaliy merkeziniñ» eksperti Boris Babinniñ fikirince, uquq ceetinden sürgünlik – genotsidniñ başıdır, onıñ soñki basamaqları ise daa yaqında atılğan edi.
«1944 senesiniñ sürgünligi – uzun bir cinayetniñ başıdır. Genotsid bir etnik gruppanı yoq etmek ya da sıñırlamaq içün yapıla, bu sıñırlama ya da yoq etüv 1944 senesi başladı ve qırımtatarlar Qırımğa avdet olmağa başlağanda, 20-nci asırnıñ tahminen 80-inci yılları yekünlengen edi», – dep qayd etti o.
Qırım Muhtar Cumhuriyetiniñ prokuraturası sovetler akimiyetiniñ qırımtatarlar ve diger tamır halqlarnıñ yarımadadan sürgün etmesi boyunca cinaiy taqiqat açtı.
Rusiyeniñ yarımada işğalinden soñ esas Ukrainağa köçken Qırım prokuraturası 160 insandan ibaret bir cedvel tizdi. Vesiqada 1944 senesi sovetler akimiyeti tarafından repressiyalarğa oğratılğan şahıs ve qorantalarnıñ malümatları mevcuttır.
