Link açıqlığı

Qırımlı programmacı Edem Asanov mektep çağına yetmegen balalar içün qırımtatar tilini ögrenmege imkân bergen mobil uyğulama işlep çıqardı. Bunı Facebookta Crimean Tatars sitesi bildire.

Uyğulama «Lafazan Efendi» adını taşıy.

«Bu offline rejiminde çalışqan qırımtatar tili dersligi. Maqsad – qırımtatar balalarında öz tilini ögrenmege aves doğurmaqtır», – dep ayta Qırım mühendislik-pedagogika universitetiniñ mezunı, uyğulamanıñ muelifi, programcı Edem Asanov.

Esas personaj – sözlerni qırımtatarlar tiline tercime etken ve oşlu ses ile seslendirgen köpeçik. Bu ğayege muelifni «Laf etken Tom» belli bala oyunı ilhamlandırdı.

Şimdilik uyğulama çeşit mevzularğa bölüngen ve 360 temel sözlerden ibaret. «Crimean Tatars» sitesiniñ bildirgenine köre, keleçekte sözlerniñ sayısı arttırılacağı planlaştırıla. Şimdilik uyğulamanı sadece Google Play vastası ile yüklemek mümkün, amma muellifniñ niyetinde «Lafazan Efendini» App Store ve Windows Phone Store saifelerinde de yerleştirmek.

Bundan ögne faaller iOS ve Android içün qırımtatar luğatını işlep çıqarğan ediler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG