Oktâbr 14 künü «Crimea-SOS» vatandaşlıq teşebbüsi Rusiyeniñ Kyivteki elçiligi qarşısında aktsiya keçirdi. Aktsiyanıñ maqsadı – oktâbr 12 künü Qırımda terroristik teşkilâtnıñ qurulmasında ve işinde iştirak etmesinde qabaatlanıp apiske alınğan qırımtatarlarğa destek bildirmek edi. Buni Qırım.Aqiqat muhbiri bildire.
«Crimea-SOS» koordinatorınıñ muavini Yevgeniya Andriyük dey ki, olar ukrain akimiyetinden sadece sesli beyanatlar degil de, faal areketler bekleyler.
«Yaqalanğanlar sadece esap raqamlarına çevirilgenlerini istemeymiz. Olarnıñ sayısı beş adamğa arttı, lâkin olarnıñ iç bir qabaatları yoq. Rusiyeden bu beş qırımtatarını azat etmege, ve bütün siyasiy mabuslarnıñ azat etilmesini talap etemiz. Ukrain akimiyetinden faal diplomatik areketlerni bekleymiz, sade beyanatlar degil», – dedi Andriyuk.
Evelki siyasiy mabus Hennadii Afanasiev te qırımtatarlarnı destekledi. O dey ki, Meclisniñ yasaq etilmesinden soñ er bir qırımtatarına qarşı cinaiy işler açılmaq mumkün.
«Bunen olar halqnı ezmege isteyler, qırımtatarlar yarımadanı terk etsinler dep», – qayd etti Afanasiev.
Qırımda oktâbr 12-de beş musulman qorantasınıñ evinde tintüv keçirildi. Beş erkek yaqalandı: Rustem İsmailov, Uzair Abdullayev, Teymur Abdullayev, Emil Cemadinov, Ayder Saledinov.
Qırımlı advokat Emil Kurbedinov Qırımda yaqalanğanlarğa «terroristik madde» boyunca tömet bildirilgenini haber etti.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
