Bağçasaray rayon mahkemesi oktâbr 14 künü Qırımtatar Milliy Meclis azası Emine Avamilevağa para cezasını tainledi.
Evelleri Avamileva Rusiye Memuriy qanun bozuvlar Kodeksiniñ 20.28 maddesi «Areketiniñ toqtatılması aqqında qarar alınğan cemaat ya da diniy teşkilâtınıñ işini teşkil etüvi» boyunca qabaatlanğan edi.
Bunı Qırımtatar Milliy Meclis reisiniñ birinci muavini Nariman Celâl Facebookta haber etti.
«Mahkemeci Atamanük muşavere odasında çoq tüşündi, lâkin neticede Emine Avamilevanı memuriy qanun bozuvında qaabatlı olraq tanıdı ve 750 ruble miqdarında para cezası aqqında qarar aldı», – dep yazdı Celâl.
Bundan ögüne Qırımtatar Milliy Meclis azası Emine Avamileva rusiye quvetleri tarafından sentâbr 30, cuma kününe Ekstremizmge qarşı küreş merkezine çağırılğan edi.
Sentâbr 28 künü Qırımtatar Milliy Meclisi reis muavini İlmi Umerovğa rusiyeli mahkeme 750 ruble para cezasını belgiledi.
Sentâbr 27-de Qırımtatar Milliy Meclisi azası Ali Hamzinge, «Rusiyede yasaq olğan cemaat birleşmesiniñ toplaşuvında iştirak etkeni içün», rusiyeli Qırım mahkemesi1000 ruble para cezasını belgiledi.
Rusiyege bağlı olğan Qırım Yuqarı Mahkemesi aprel 26 künü Meclisniñ areketini toqtatmaq qararını alğan edi. Dünya toplulığı rus akimiyetiniñ böyle faaliyetine qatiyen qarşı çıqtı. Meclisniñ imayesi Rusiye Yuqarı Mahkemesine şikâyet arizasını yollağan edi.
Sentâbr 29-da Rusiye Yuqarı Mahkemesi şikâyet arizasına cevap olaraq, Qırımtatar Milliy Meclis areketiniñ yasaqlanmasını tasdiqladı.
Ukrainı Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunen beraber TİN Dünya toplulığına muracaat etip, bütün mumkün olğan siyasiy ve uquqiy çareler ile Rusiyege tesir etmege, onıñ totalitar usullarnen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı ve esirlerni azat etmege çağırdı.
