57 biñge yaqın ukrain vatandaşı göñülli olup Ukraina Silâlı quvetlerine, Milliy gvardiyağa ve diger hızmetlerge kontrakt añlaşmasınen kirdi, dep beyan etti Ukraina prezidenti Petro Poroşenko.
«Tek bu sene devamında 57 000 ukrain göñüllisi kontrakt imzaladı. Hızmet etip evge qaytqanlardan ise endi 100 000 asker sayısında birinci nevbet acele yedegi teşkil etildi. Ve devletimizniñ tarihında ilk kere yedektekilerniñ iştiraginen ciddiy idmanlar keçirildi», – dedi Poroşenko Ukraina qoruyıcısınıñ Kününde, İ. Bogun adına Kiyev arbiy litseyiniñ talebeleri tantanalı surette yemin ketirgenleri merasimde.
«2014 senesi baarde kerçekten ordu olmağanı vaqıtta cebege göñülliler batalyonları yollanılğan edi. Soñra qısım mobilizatsiyalarına emiyet berildi. Şimdi ise biz mudafaamız öyle bir inkişaf etti ki, biz ihtisaslı ordumıznı qura bilemiz», – dep qoştı ukrain prezidenti.
Poroşenkonıñ sözlerine köre, ukrain ordusınıñ arbiy bölüklerinde tahminen 10 000 qadın hızmet ete.
Donbastaki çatışmalar vaqıtında, prezidentniñ malümatına köre, 2533 ukrain askeri elâk oldı.
Ukrainanıñ şarqında silâlı dava 2014 senesi baarde, Qırım Rusiye tarafından işğal etilgen soñ başlanğan edi. Ukraina ve Ğarp separatistlerniñ dekteklenmesinde Rusiyeni qabaatlay. Kremlin bu qabaatlarnı inkâr ete ve Donbasta rusiyeli «göñülliler» bulunmaq mumkün olğanlarını bildire. BM malümatına köre, dava devamında tahminen 10 000 insan elâk oldı.
Ukraina qorçalayıcısınıñ künü 2014 senesi oktâbr 14 künü Ukraina prezidenti tarafından tain etildi. Tarih olaraq bu bayram Meryemananıñ Qorunması diniy bayramınen bağlı, Zaporozhye kazakları onı özlerine imayeci olaraq qabul ete ediler.
