Ukraina Prezidenti Petro Poroşenko Ukraina boyunca PACE rezolütsiyasını Rusiyeniñ basqıncılığına qarşı küreşnide diplomatiyanıñ ğalebesi olaraq adlandırdı. Böyle beyanat ukrain prezidentiniñ Facebook saifesinde yerleştirile.
«PACE ilk kere Rusiyeni istilâcı-devlet olaraq tanıdı, onı öz ordularını çıqarmağa ve cenkâverlerge arbiy destek bermekni toqtatmağa çağırdı ve tam olaraq Urkainanıñ Qırım ile birlikte topraq bütünligine qaytsız qoltuttı. Bu ukrain diplomatiyasınıñ, Ukraina Yuqarı Şura deputatlarınıñ ve ukrain tarafını tutqan halqara ittifaqnıñ umumiy ğalebesidir», – yazdı Poroşenko.
Em de Poşenko Rusiye eyyetiniñ Avropa Şurasınıñ Parlament Assambleyasına qaytacağı aqqında beyanatlar vaqıttan evel yapılğanını ayttı.
«Rus istilâsı ve halqara uquqnıñ, şu cümleden Avropa Şurasınıñ, esas maddeleriniñ bozulması toqtatılmağanına qadar, ve Ukrainanıñ topraq bütünligi ğayırdan tiklenmegine qadar PACE-de Rusiye eyyetiniñ salâhiyetini qaytarmaq meselesini baqmaq erte olğanını tüşünem», – dedi Ukraina devlet yolbaşçısı.
Bundan ögüne Avropa Şurasınıñ Parlament Assambleya prezidenti Pedro Agramunt rus eyyetiniñ Strasbourgta olmağanından sebep kederlengenini bildirgen edi.
Qırım işğalinden soñ, 2014 senesi aprel ayında Rusiye eyyetini rey bermek aqqından marum ettiler ve PACE-niñ idare organlarından çıqardılar. Buña cevaplanıp, Rusiye eyyeti Şuranıñ işinde iştirak etmemege qarar aldı.
Oktâbr 12 künü Avropa Şurasınıñ Parlament Assambleyası Ukraina boyunca eki rezolütsiya qabul etti – Rusiye istilâsınıñ aqibetleri ve Kiyevniñ kontrolü astından çıqqan ukrain topraqlarında insan aqlarınıñ vaziyeti. Ayrıca Rusiye eyyeteniñ şurada iştirak etecegine qarşı cezanıñ devam ettirilmesi aqqında qarar alındı. Rusiye istilâsınıñ aqibetleri aqqında rezolütsiyada «Ukrainadaki dava» sözlerini «Rusiyeniñ Ukrainadaki basqıncılığı» sözlerine deñiştirdiler. Bundan da ğayrı ukrain eyyetiniñ teşebbüsinen rezolütsiyada işqal olunğan Qırımda Devlet Dumasına saylavlarnıñ keçirilmesine qarşı itiraz bildirildi. PACE Donbasta ateşniñ toqtatılmamasınen, Qırımda Meclisniñ yasaq etilmesinen, uquq qorçalayıcı me haber vastalarına çalışmağa keder etilgeninen raatsız olğanını da bildirdi.
