2017 senesi baarinden başlap Qırımda askerlikke alınğanlarnı yarımada tışına yollaycaqlar. Bunı cumaaqşamı künü, oktâbr 13-de, Aqmescitteki matbuat konferentsiyasında Rusiye kontrol etken Qırımnıñ arbiy komissarı, polkovnik Aleksandr Maloletko bildirdi.
Onıñ aytqanına köre, 2017 senesiniñ baar ve küz mevsimlerinde 2-2,5 biñ genç erkek Qırımdan uzaq bir yerde askerligini yapacaq.
«Al-azırda mında (Qırımda – QA) askerlik yapqanlar arbiy bölükni bütünley memnün etmey. İnsanlar qıtağa barıp, munda ögrenmeycek şeylerni ögrensinler isteymiz, bizim içün bu müimdir», – dep tekrarlay arbiy komissarnıñ aytqanlarını RİA Krım agentligi.
2016 senesi oktâbr-dekabr aylarında Qırımda yerleşken arbiy bölükler keçken baarde olğanı qadar toldurılacaqtır.
Maloletkonıñ aytqanına köre, baarde Rusiye ordusı ve diger uquq qoruyıcı hızmetlerine 1560 insan kirdi.
Bundan evel Anatoliy Maloletko 2016 senesi baarde «tizilgen plan 99%-ğa kerçekleştirildi», dep bildirgen edi. Aydavcılarnen bağlı bir problem çıqtı, aydavcı şeadetnameleri Rusiye şeadetnamelerine deñiştirilmegen edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
