Link açıqlığı

Saatnıñ esas haberi

Qırımda oktâbr 12-de yaqalanğan qırımtatarlarnıñ mahkemeleri belgilendi


Mamaqta yaşağan qırımtatarınıñ evinde keçirilgen tintüv, 2016 senesi oktâbr 12 künü
Mamaqta yaşağan qırımtatarınıñ evinde keçirilgen tintüv, 2016 senesi oktâbr 12 künü

Qırımda oktâbr 13-de tahminen saat 14:30’da oktâbr 12-de tintüvlerden soñ FSB idaresine alıp ketirilgen beş qırımtatarına ceza berüv mahkemeleri başlaycaqtır.

Toplaşuvlar Aqmescitniñ Kiyev rayonı mahkemesinde keçirilecek.

Bunı advokat Emil Kürbedinov Facebookta bildirdi.

«Tahminen saat 14-30’da tünevin Mamaq ve Boğurçada yaqalanğan beş qırımtatarına ceza berüv mahkemeleri olacaqtır. Kiyev rayonı mahkemesi», – dep yazdı Kürbedinov.

Qırımda çarşenbe künü, oktâbr 12-de, qırımtatarlarnıñ evlerinde tintüvler olıp keçti. Qırımtatarlarnıñ advokatları ve Rusiye kütleviy haber vastaları beş tintüv aqqında bildirdiler.

Qırım siyasetşınası Yeleonora Dülber Facebook saifesinde oktâbt 12-de sabadan Rusiye uquq qoruyıcıları kelgen insanlarnıñ adlarını ve yaşağan yerlerini yazdı.

«Tintüv keçirilgen qırımtatarlar cedveli: Rustem İsmailov, 32 yaşında, Boğurça (Kamenka), Abdullayev Uzair, 42 yaşında, Mamaq (Strogonovka), Abdullayev Teymur, 41 yaşında, Mamaq (Strogonovka), Cemadenov Emil, Saledinov Ayder», – dep bildirdi Dülber.

Qırım advokatı Emil Kürbedinov bildirdi ki, Qırımda yaqalanğanlar «terrorizm maddesi» boyunca şeklene.

«Timur Abdullayev 205.5 maddesiniñ 1-inci qısmı boyunca qabaatlana, Üzeir Abdullayev, Rustem İsmailov, Ayder Saledinov ve Emil Cemadenovnı 205.5 maddesiniñ 2-nci qısmı boyunca qabaat berile», – dep ayttı advokat.

Qırım jurnalisti Lilâ Bucurova Facebookta bildirdi ki, «Bizim balalar» cemaat areketi oktâbr 12-de Qırımda yaqalanğanlarnıñ balalarını baqacaq.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG