Link açıqlığı

«Bizim balalar» yaqalanğan Aqmescit musulmanlarınıñ balalarını baqmağa söz bere


Mamaqta tintüv, 2016 senesi oktâbr 12 künü

«Bizim balalar» cemaat areketi oktâbr 12-de Qırımda yaqalanğanlarnıñ balalarını baqmağa vade ete. Bunı Qırım jurnalisti Lilâ Bucurova Facebook saifesinde bildirdi.

«Bugün Qırımda tintüvlerden soñ daa beş musulmanı yaqalandı. Belli ki, olar ya «hizb» ve «terrorist» olacaqlar, Allahqa inanıp ve dua yapıp, Rusiye havfsızlığı içün telükeli sayılalar», – dep bildirdi jurnalist.

Bucurovanıñ aytqanına köre, bugün babaları yaqalanğan beş qorantanıñ 17 balası bar. «Bu vaqıtqa qadar «Bizim balalar» cemaat areketi siziñ yardımıñız ile mabus, ğayıp olğan ve öldürilgen Qırım musulmanlarınıñ 47 balasını baqtı. Bugün olarnıñ sayısı arttı – 64. Amma eminim: büyük qırımtatar qorantamıznıñ eyiligi ve merameti er keske yeter», – dep yekünledi jurnalist.

Qırımda çarşenbe künü, oktâbr 12-de, qırımtatarlarnıñ evlerinde tintüvler olıp keçti. Qırımtatarlarnıñ advokatları ve Rusiye kütleviy haber vastaları beş tintüv aqqında bildirdiler.

Qırım siyasetşınası Yeleonora Dülber Facebook saifesinde oktâbt 12-de sabadan Rusiye uquq qoruyıcıları kelgen insanlarnıñ adlarını ve yaşağan yerlerini yazdı.

«Tintüv keçirilgen qırımtatarlar cedveli: Rustem İsmailov, 32 yaşında, Boğurça (Kamenka), Abdullayev Uzair, 42 yaşında, Mamaq (Strogonovka), Abdullayev Teymur, 41 yaşında, Mamaq (Strogonovka), Cemadenov Emil, Saledinov Ayder», – dep bildirdi Dülber.

Qırım advokatı Emil Kürbedinov bildirdi ki, Qırımda yaqalanğanlar «terroristik madde» boyunca şeklene.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

Qırım işğalinden soñ yarımadada mustaqil jurnalistler, qırımtatar faalleri ve Meclis azalarında tintüvler sıqlaştı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.


XS
SM
MD
LG