Aqmescit rayonında 2019 senesine qadar bala bağçalarında qoşma 740 yer açmağa ve 800 talebeni sığdıracaq mektepni qurmağa planlaştırıla. Bunı Krıminform Kreml tayin etken Aqmescit memuriyetiniñ yolbaşçısı İrina Boykonıñ aytqanlarına esaslanıp bildire.
Boykonıñ aytqanına köre, al-azırda Suin-Acı (Denisovka) köyünde 100 yer olacaq bala bağçası qurula, Acı Qal (Çistenkoye) köyünde yılnıñ soñuna qadar 80 yerlik «Alenuşka» bala bağçası azır olacaqtır. Solneçnoye köyünde 80 yerlik «Gvozdiçka» bala bağçasında tamir işleri yapıla ve Bulğanaq Badraq (Pojarskoye) köyünde 240 yerlik «Skazka» bala bağçası bütünley tamir etile.
«2017-2018 seneleri Şumhay (Zareçnoye) ve Mamut Sultan (Dobroye) köylerinde 120 yerlik bala bağçalarınıñ qurulması beklenile», – dep ayttı Boyko.
Boyko şunı da ilâve etti, yarımadanıñ şimdiki akimiyeti Şumhayda qurulacaq mektepniñ leyha vesiqalarını azırlay.
Rusiye işğal etken Qırımnıñ bala bağçalarına ihtiyacı bar. Kreml tayin etken yarımada yolbaşçısı Sergey Aksenov dey ki, nevbetler yarımadağa «iş maqsadınen» kelgen Rusiye devlet hızmetçilerinden sebep peyda oldı.
