«Kahovskaya-Titan» elektroenergiya ağınıñ (işqal olunğan Qırımğa elektrik yetkizgen dört ağdan biri – QA) tamirlenmesi içün «Ukrenergo» 2 964,63 biñ grivnâ masraf etti.
Bunı müessiseniñ matbuat-hızmeti Qırım.Aqiqatnıñ muracaatına cevap olaraq bildirdi.
Müessisede qayd ettiler ki, tamir işleri 2016 senesi mart ayında başlanğan ediler.
«Herson vilâyetindeki Kalançak ve Çaplınka rayonlarınıñ sakinlerini telükesiz şekilde elektrik energiyasınen temin etmek içün 25 mayıs 2016 senesi «Kahovskaya-Titan» yüksek voltajlı ağnı 220 kV aqımından 150 kV aqımına keçirüv işleri başlandı, ve 22 iyün 2016 senesi olar yekünlengen ediler. Bu işlerniñ masrafları 55,93 biñni teşkil etti. Aynı vaqıtta bu ağda evelden belgilengen rekonstruktsiya işleri keçildi, episi olup 2 964,63 biñ masraf etildi», – dep qayd ettiler şirketniñ matbuat-hızmetinde.
«UkrEnergonıñ» bergen malümatına köre, bügünki künde işğal olunğan Qırımğa tamir etilgen asılı ağlardan elektroenergiya berilmey.
Herson vilâyeti territoriyasında «Kahovskaya - Titan» adlı 220 kV VL yerleşken. Şu stantsiyadan elektrik energiyası Kalançak, Çaplinka rayonları ve işğal etilgen Qırımğa tarqatıla edi. Herson vilâyetinde yerleştirilgen elektrotayamanıñ ihtimal patlavı sebebinden Ukrainadan Qırımğa elektrik energiyasınıñ kelmesi toqtatıldı. Şimdiki vaqıtta Qırımğa 250 megavat bergen elektrik keçirme ağı tamir etilgen, lâkin añlaşma bitkeni içün yarımadağa berilmey.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
