Qırımtatar faali, Kefe regional Meclis azası Suleyman Kadırov Rusiyeniñ Qırım ve Aqyar boyunca FSB idaresine sorğuğa çağırıldı. Bunı Qırımtatar Maaliy Merkezi bildire.
Kadırovnıñ sorğusı, oktâbr 11 künü saat 14-00 Amescitte İ. Franko bulvarı, 13 adresi boyunca ötkerilmeli.
Okâbr 5 künü Suleyman Kadırovnıñ evinde tintüv keçirilgen edi.
Qırımtatar Milliy Qurultaynıñ MSK reisi Zair Smedlâyevniñ bildirgenine köre, tintüv içün sebep – qırımtatar ATR telekanalında kösterilgen levha oldı.
«Tintüv, Rusiye Federatsiyasınıñ sıñırlarını tanımağanında ve qırımtatar «Asker» batalyonına destek bergeninde şeklengeni sebebinen, mahkemeci Rodionov İgör İvanoviçniñ qararınen keçirildi. Sanki, mart 29 künü çıqqan levhada, Suleymanovnıñ «Qırım – Ukrainadır» degen sözleri ketirile!» – dep yazdı Smedlâyev.
Qırım işğalinden soñ yarımadada mustaqil jurnalistler, qırımtatar faaleri ve Meclis azalırinda tintüvler sıqlaştı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunen beraber TİN Dünya toplulığına muracaat etip, bütün mumkün olğan siyasiy ve uquqiy çareler ile Rusiyege tesir etmege, onıñ totalitar usullarnen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
