AQŞ Devlet kâtibi John Kerry, Minsk añlaşmaları eda etilmese, Rusiyege qarşı sankstiyalar devam ettirilecegini beyan etti.
«Minsk añlaşmalarınıñ becerilmesi içün biz Rusiyege basqı yapmaq kerekmiz. Açıqtan beyan etmelimiz ki, nevbetteki aylar devamında bu añlaşmalar amelge keçirilmese, yaptırımlarnıñ mıtlaq devam ettirilecekler. Bu bizim istegimiz degil, lâkin, biz ileri keçip olamasaq, bu bizim yekâne çaremiz olacaq», – dedi Kerry okâbr 7 künü Washington şeerinde Frenkistan Tışqı işler naziri Jean-Marc Ayrault ile birlikte matbuat konferentsiyası devamında.
Ukraina ve Ğarp devletleri defalarca Rusiyeni Donbasta ve Qırımda vaziyetniñ bozulmasını toqtatmağa çağırdı. Qırımnıñ işğal etilmesi ve Ukrainanıñ şarqında cenkâverlerge destek berilmesi sebebinden Moskvağa qarşı sanktsiyalar qullanıldı.
Rusiye Ukrainanıñ şarqındaki vaqialarda iştiraq etkenini inkâr ete. Ayrıca, Moskva Donbasnıñ işğal olunğan qısımında rus ordusı olmağanını, ancaq «göñülliler» olğanını tasdiqlay.
Minsk añlaşmaları, hususan, Ukrain topraqlarından çet devletlerniñ arbiy tehnikasınıñ ve qurumlarnıñ çıqarılmasını talap ete.
