Link açıqlığı

AB Qırımdan Dumağa saylanılğan deputatlarğa qarşı sanktsiyaları muzakere etmege azır


Arhiv resimi: Aqmescit demiryol vokzalı yanında şeer ilânı, 15 sentâbr 2016 senesi

İşğal etilgen Qırımdan Rusiye Devlet Dumasına saylanılğan deputatlarğa qarşı sanktsilarnı kirsetmek meselesini Avropa Birliginde muzakere etmege azırlar.

Bunı Brükselde oktâbr 7, cuma künü AB ile mesleatlar yekünlengen soñ Ukraina Adliye naziriniñ muavini Sergiy Petuhov ve Ukraina Haber siyaseti naziriniñ birinci muavini Emine Ceppar bildirdiler. Bunı UNİAN haber ete.

«Olar Devlet Dumasına saylanılğanlarnen şahsiy sanktsiyalar cedvelini uzata bileler. Çünki bu insanlar, saylanğanlarından ğayrı, Qırımda şimdi mevcut olğan vaziyetniñ yaratılmasında da iştirak etken ediler. Olarğa AB devletlerinde seyaat etmege yasaq etecek sanktsiyalar – munasip reaktsiya olacaqtır, ve bir de bir resmiy ziyaretlerde er angi seviyede Rusiyeni temsil etmege imkân bermez», – dedi Petuhov.

Ceppar qayd etti ki, mesele 7 deputatnen bağlı, olardan ekisi – Mihail Şeremet ve Natalya Poklonskaya – endi sanktsiyalar cedveline kirsetilgenler.

«Bizim esas nutığımız Rusiye olarnı tesir etmek maqsatlarınen qullana bilecegini añlata edi. Biz añlaymız, olarnı çeşit türlü halqara teşkilâtlarğa, konferentsiyalarğa «Qırımnıñ sesi» şekilinde Qırımdaki öz «resimini» köstermek içün alıp yürsetecekler. Onıñ içün biz, öz noqta-i nazarımıznı açıqlap, bu insanlar içün de AB devletlerine kiriş yasaq etilmek kerek olğanını deymiz», – qayd etti Ceppar.

Devlet Dumasına saylavlar sentâbr 18 künü qarışıq sistema boyunca keçirildi. Rusiye merkeziy saylav komissiyası Duma saylavlarınıñ neticelerini sentâbr 23 künü tasdiqladı. «Yedinaya Rossiya» partiyası episi olup 343 mandat qazandı. Moskva saylavlarnı işğal etilgen Qıqımda da keçirmege qarar aldı, bu ise Kyiv ve Ğarbiy devletler tarafından qattiyen tenqid etildi.

Bir sıra devletler, bu cümleden, AQŞ, Kanada, Frenkistan, İsveçiya işğal etilgen Qırım territoriyasında saylavlarnıñ qanuniy olğanını tanımağa red etti. Poloniya Tışqı işler nazirligi Rusiye Devlet Dumasına bütün parlament saylavlarınıñ qanuniy olğanını şübeli saydı. Sentâbr 20 künü Ukraina Yuqarı Radası işğal olunğan Qırımda keçirilgen saylavlarnı qanunsız olaraq tanıp, Rusiye Devlet Dumasınıñ VII terkibini bütünley red etti.

XS
SM
MD
LG