Rusiyede taqiqat organı gazeteci Roman Suşenkonı resmiy olaraq casuslıqta qabaatladı. Bunı TASS agentligine onıñ advokatı Mark Feygin bildirdi.
«Oña qabaat bildirildi. Taqiqatçı fabulanı añlatmağa devam ete», – dedi advokat.
Feyginniñ sözlerine köre, Suşenko Cuma künü, oktâbr 7-de, qabaatlanğan şahıs olaraq taqiqatçığa ifadelerini bermeycek, çünki onıñ advokat ile subetleşmege imkânı olmadı.
Moskvada sentâbr 30 künü ukrainalı jurnalist, Rusiyege şahsiy niyetlerinen soy-soplarını ziyaret etmege kelgen «Ukrinform» agentliginiñ Frenkistandaki mahsus muhbiri Roman Suşenko yaqalandı. Rusiye FSB hızmeti onı casuslıqta qabaatladı ve o «Ukraina Mudafaa nazirliginiñ İstihbarat baş merkeziniñ hadimi» olğanını ayttı. Moskvanıñ Lefortovo mahkemesi onı eki ayğa apishanege oturttı. Muhbirniñ ailesi tarafından imayeci olaraq celp etilgen advokat Mark Feygin bir künden ziyade Suşenko ile körüşip olamay edi. Oktâbr 5 ve 6 künleri advokat kene onnen körüşip olamay edi.
Oktâbrniñ 4-de körüşüp olğan soñ, Feygin ukrain jurnalisto öz qabaatını tanımaycağını ayttı.
Ukraina Mudafaa nazirligi de muhbirniñ öz müessisesine ve arbiy istihbaratqa bağlı olğanını inkâr etti.
