Rusiyege bağlı olğan Aqmescid Merkeziy rayon mahkemesi oktâbr 7 künü Enver Mamutov, Remzi Memetov, Zevri Apseitov ve Rustem Abiltarovnı 2017 senesi yanvar 12 kününe qadar apiste qaldırmağa qarar aldı.
Bunı Facebook saifesinde Qırımtatar Milliy Qurultayınıñ Merkeziy saylav komissiya reisi Zair Smedlâyev bildirdi.
Bundan evel Rusiyeniñ nezareti astındaki işğal olunğan Qırımnıñ Yüksek mahkemesi «Hizb ut-Tahrir» işi» boyunca mahküm etilgen Enver Mamutov ve Remzi Memetovnıñ tutulma muddetlerini uzatqan qararğa qarşı yapqan şikâyetlerini memnün etmedi. İyül 22 künü aynı mahkeme «terorizmde» qabaatlanğan Zevri Abseitov ve Rustem Abeltarovnı apiste qaldırdğan edi.
Mayıs 12-de Bağçasarayda rusiyeli uquq qoruyıcılar musulmanlarnıñ evlerinde ve yerli qavehanede bir sıra tintüvler keçirdi. Neticede, dört Bağçasaray sakini yaqalandı ve terrorizmde qabaatlandı: Zevri Abseitov, Remzi Memetov, Rustem Abeltarov ve Enver Mamutov. Olar FSB hadimleri tarafından Rusiyede terroristik teşkilâtı olaraq tanılğan «Hizb ut-Tahrir» teşkilâtında iştirak etkenlerinde şeklenilip yaqalandı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
