Bağçasaray rayon mahkemesinde oktâbr 7 künü Qırımtatar Milliy Meclis azası Enver Kurtiyevni 500 ruble miqdarında para cezasını belgilediler.
Bunı Facebook saifesinde Qurultaynıñ MSK reisi Zair Smedlâyev bildirdi.
Bu malümat resmiy şekilde daa tasdiqlanmadı.
Keçenleri qırımdaki mahkemeciler Qırımtatar Milliy Meclis azaları Ali Hamzin, İlmi Umerov, Sadıh Tabah, Şevket Kaybullayev ve Bekir Mamutov içün para cezası aqqında qarar alğan ediler.
Emine Avamilevanıñ işi oktâbr 14 künü baqılmağa devam etecek, Mustafa Mauşevniñ işi – oktâbr 20 künü, Dilâver Akiyevniñ – 24 oktâbrde baqılacaqtır.
Rusiyege bağlı olğan Qırım Yuqarı Mahkemesi aprel 26 künü Meclisniñ areketini toqtatmaq qararını alğan edi. Dünya toplulığı rus akimiyetiniñ böyle faaliyetine qatiyen qarşı çıqtı. Meclisniñ imayesi Rusiye Yuqarı Mahkemesine şikâyet arizasını yollağan edi.
Sentâbr 29-da Rusiye Yuqarı Mahkemesi şikâyet arizasına cevap olaraq, Qırımtatar Milliy Meclis areketiniñ yasaqlanmasını tasdiqladı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
