Ukraina Adliye nazirligi Meclis ile birlikte İnsan aqları boyunca Avropa mahkemesine muracaat azırlay. Muracaat rus mahkemesi tarafından Qırımtatar halqınıñ temsil organına Rusiyede çalışmağa yasaq etilgeninen bağlı olacaq. Bunı Yuqarı Radada yapqan çıqışı devamında Ukraina Adliye naziri Pavlo Petrenko bildirdi.
«Rusiye Federatsiyasında Meclisniñ faaliyeti sözde yasaqlanğanına qarşı Meclis ile birlikte şikâyet azırlaycağımıznı evelden haber etmege isteyim», – dedi Petrenko.
Ukrain Naziriniñ sözlerine köre, böyle bir yasaq «Avropa topraqlarında bütün halqqa nisbetten genotsid areketleriniñ yapılması, milliy tarihnıñ misilsiz vaqiası olaraq sayıla». Petrenko qayd etti ki, İnsan aqları boyunca Avropa mahhkemesi qurulğanından berli episi olup tek 16 devletlerara iş baqtı.
«Soñki eki yıl devamında Ukraina 5 şikâyet yolladı. Olar cenknen, ukrain vatandaşlarınıñ genotsidinen ve Avropa topraqlarında insan aqlarınıñ kütleviy sürette bozulmasınen bağlılar», – söyledi Pavlo Petrenko.
Rusiyege bağlı olğan Qırım Yuqarı Mahkemesi aprel 26 künü Meclisniñ areketini toqtatmaq qararını alğan edi. Dünya toplulığı rus akimiyetiniñ böyle faaliyetine qatiyen qarşı çıqtı. Meclisniñ imayesi Rusiye Yuqarı Mahkemesine şikâyet arizasını yollağan edi.
Sentâbr 29-da Rusiye Yuqarı Mahkemesi şikâyet arizasına cevap olaraq, Qırımtatar Milliy Meclis areketiniñ yasaqlanmasını tasdiqladı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
