Qırımda çığarılğan mahsulatlar ealige yetişmey, Rusiyeden ketirilgen mahsulatlar ise keyfiyetsiz.
Böyle fikirni Qırım.Aqiqat Radiosınıñ efirinde ğarbiy Qırımda yaşağan fermacı Leonid Zadorojnıy seslendirdi. O rus mahsulatlatına nisbetten öz davranışını añlattı.
«Ucuzca olğan (kolbas – QA), soyalı, köpek bile aşamay, köpekke aşatıp baqtım – qoqlay da kete. Süt Rusiyede ende çoqtan yoq. Bütün qanfetler accı, anda soya soqalar: bütün qanfetlerge, şokoladqa ve er yerge. Aşalacaq mahsulat – tek 50 rubleden tavuq yımırtası, 50 rubleden şeker, alınmaq mumkün, ve ötmek te fena degil. Böyle baqsañ, mahsulat bar, amma onı aşamağa mumkün degil», – dedi o.
2015 senesi sentâbr ayında Herson vilâyetinde yerleşken cemaat faalleri Qırımğa mahsulat qamaçavını ilân ettiler. Budan soñ Ukrainada çıqarılğan mahsulatlar yarımadağa ketirilmey qaldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
