Link açıqlığı

Avropa Parlamenti oktâbr 6 künü 2016 Saharov adına Fikir serbestligi mukâfatına teklif etilgen namzetlerniñ qısqa cedvelini tizdi.

Namzetler arasında – qırımtatar siyasetçisi Mustafa Cemilev te keçe. Meclisniñ sabıq reisi olıp, o Qırımnıñ işğaline qatiyen qarşı çıqtı ve şimdi Kyivte yaşay (Cemilevniñ namzetini Avropa Parlamentiniñ eñ büyük siyasiy birligi – Avropa halq partiyası – teklif etti – QA).

Daa bir namzet – türkiyeli «Cumhuriyet» gazetasınıñ sabıq muarriri Cam Dündar oldı. Dündar keçken sene noyabr ayında, onıñ gazetası Türkiye tarafından Suriyedeki isyancılarğa ğayri resmiy şekilde silâ satılğanı aqqında yazğanından soñ, apiske alındı.

Olarnen beraber namzetlerniñ qısqa cedveline İlham Tohti de kirdi. Tohti – advokat olıp, Çinde Uyğur azlığınıñ ömürlük apiske oturtılğan vekillerini qorçalay.

Yezidi azlığını ve qadınlarını qorçalağan, İŞİD tarafından esir etilgen Nadia Murad Basee ve Lamiya Aji Bashar da cedvelge kirsetildiler.

Avropa Parlamenti mukâfatqa nail olğanlarnı oktâbr 27 künü ilân etecek. Mukâfatlandıruv merasimi dekabrde Strasbourg şeerinde keçirilecek.

50 biñ euro tekil etken bu mukâfat Avropa Parlamenti tarafından 1988 senesi tesis etilgen edi ve er yıl insan aqları ve söz serbestligi oğrunda kureşken şahıs ya da taqımlağa berile.

Çeşit yılları mukâfatqa Nelson Mandela, Aqrusiye jurnalistler birligi, «Sıñırsız jurnalistler» ve Rusiyedeki «Memorial» uquq qorçalayıcı cemiyet nail olğan ediler.

XS
SM
MD
LG