Kelecek seneden başlap Rusiye aliy oquv yurtlarına kirecek Qırım ve Aqyar talebeleri imtiyazlarnı qullanıp olamaycaqlar. Bu Sankt-Peterburg devlet üniversitetinde Rusiyede 2017 senesi keçirilecek kiriş kampaniyasınıñ yañılıqları taqdim etilgende bildirildi.
«Kelecek seneniñ qaidelerine kirsetilgen deñişmeler çoq degil, lâkin olar pek zarurlar. Olardan birisi – Qırım ve Aqyar sakinleri içün devlet yerlerinde kvotalar olmaycağıdır. Ende bu regionlarda mektep bitirgen talebeler Rusiye Federatsiyasınıñ aliy oquv yurtlarına kirecekleri vaqıtta umumiy yarıştan keçmek kerek olacaqlar», – dedi taqdim merasiminde Sankt-Peterburg devlet üniversitetiniñ vekili Yekaterina Babelük.
Rusiye akimiyeti 2015 senesi küzde Qırımlı abituriyentler içün imtiyazlı şaratlarnıñ 2016-ne devam ettirilmesi aqqında qanunnı qabul etken edi. Qırım mektepleriniñ mezunları Yekâne devlet imtihanlarını (YDİ) tapşırmaq mecbur degil ediler.
İşgalden soñ Qırım talebeleri problemnen rastlaştılar – yarımadada Rus akimiyeti tarafından berilgen diplom ve atestatlarnı Ukraina qabul etmey. Aynı şekilde halqara Aliy oquv yurtları da davrana. Qırımda berilgen tasil vesiqalar tek Rusiyede ve yarımadanıñ özünde tanıla.
