Link açıqlığı

Amsterdam Bölge mahkemesi «skit altınları» işinde qararnı dekabr 14 künü alıp olur. Bunı mahkeme meclisinde iştirak etken Ukraina Haber siyaseti nazirini birinci muavini Emine Ceppar öz Facenook saifesinde bildirdi.

Mahkeme toplaşuvınıñ soñuçlarını Ceppar daa açıqlamadı.

Qırımnıñ muzeylerinden alınğan ve işğalinden soñ Amsterdamda saqlanılğan «skit altınları» toplamı boyunca mahkeme diñlevleri oktâbr 5, çarşenbe künü Amsterdam Bölge mahkemesinde başlandı.

Çarşenbe künü mahkeme eksponatlarnı özlerine qaytarılmasını talap etken Qırım muzeyleriniñ vekillerini diñledi.

2014 senesi fevral-avgust aylarında Amsterdam şeerindeki Allard Pierson adına muzeyde «Qırım – Qara deñizde altın ada» adlı sergi keçirile edi. Onda Qırımdaki dört muzeyden alınğan, Qırımda skitler, sarmatlar ve gotlarnıñ medeniyetini taqdim etken eksponatlar numaiş etile edi.

Qırım işğalinden soñ ukrain akimiyeti, tarih eserleri muzeylerniñ malı degil de, Ukrain devletiniñ mülkine ait olğanını beyan etti. Öz nevbetinde Qırımdaki muzeyler degerliklerniñ olarğa qaytarılmasını talap ettiler. Bu arada Hollanda muzeyi, bilgili mahkemeniñ qararı olmağance ya da eki taraf añlaşmağance, eksponatlarnı ne Ukrainağa, ne de Qırımğa yollamamağa qarar aldı.

Qırımdaki dört muzey Amsterdam mahkemesine Allard Pierson adına muzeyge qarşı toplu şikâyet yollap, kollektsiyanı Qırımğa qaytarmağa talap etti. Bu iş boyunca mahkeme toplaşuvı oktâbr 5 künü ötkerilecek.

XS
SM
MD
LG