Yuqarı Rada bügün Avropa Parlamenti, NATO, PACE ve OSCE teşkilâtlarına muracaat etip Qırımtatar Milliy Meclisiniñ Rusiyede yasaq etilmesini muzakere etmege ve qabul etmemege çağırdı. Ukraina halq vekilleri dünya toplulığını Meclisniñ yasaqlanması aqqında qarar alğan Rusiyedeki ve işğal etilgen Qırımdaki mahkemecilerge qarşı şahsiy sanktsiyalarnı qullanmağa çağırdı.
Qırımtatar Milliy Meclis reisi, Ukraina halq vekili Refat Çubarov, Parlament toplaşuvında sözge çıqıp, hatırlattı ki, aprel 26 künü Qırımdaki mahkeme Meclisniñ yasaq etilmesi aqqında qarar aldı ve «bazı muzakerelerden soñ» ve «ğarbiy ortaqlarnıñ ricasınen» Meclis Rusiyeniñ Yüksek mahkemesine şikâyet arizasını yolladı.
Halq vekili Svitlana Zalişçuk qayd etti ki, Meclisniñ Qırımda yasaq etilgeninden soñ yañı basqılar dalğası köterildi.
«Bügün biz FSB tarafından Kefede regiona Meclis azalarından biri Suleyman Kadırovnıñ evinde tintüv keçirilgeni aqqında oqudıq. 3000 Meclis azalarından birisi, Rusiye Yüksek mahkemesi Meclisniñ teroristik teşkilât olaraq tanılmasına şikâyetni red etken soñ, daa farqlı repressiyalar seviyesine oğray», – dep qayd etti Zalişçuk.
Parlamentte №5215 olaraq qayd etilgen «Rusiye Federatsiyasında Qırımtatar Milliy Meclisiniñ takbih etilmesi ve tanılmaması, ve dünya toplulığı tarafından Qırımda tamır halqınıñ qorçalanması aqqında Ukraina Yuqarı Şurasınıñ halqara teşkilâtlar ve tış devlerniñ parlamentlerine muracaatı» aqqında qararnı, 226 deputatnıñ reyi yeterli olğanda, 248 halq vekili destekledi.
Rusiyege bağlı olğan Qırım Yuqarı Mahkemesi aprel 26 künü Meclisniñ areketini toqtatmaq qararını alğan edi. Dünya toplulığı rus akimiyetiniñ böyle faaliyetine qatiyen qarşı çıqtı. Meclisniñ imayesi Rusiye Yuqarı Mahkemesine şikâyet arizasını yollağan edi.
Sentâbr 29-da Rusiye Yuqarı Mahkemesi şikâyet arizasına cevap olaraq, Qırımtatar Milliy Meclis areketiniñ yasaqlanmasını tasdiqladı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
