Finlandiyada oktâbr 29 künü Qırımnıñ Rusiye tarafından işğal etilmesi aqqında vesiqalı film kösterecekler. Bunı Faceboota «Zemaneviy ukrain kinosı» gruppasınıñ faalleri bildirdi.
«Ukrainanıñ Finlandiyadaki elçihanesinde oktâbr 29 künü Qırımnıñ Rusiye tarafından işğal etilgeni aqqında vesiqalı film ve genç ukrain rejissörı Nariman Aliyevniñ üç qısqa bediy filmleri kösterecek», – dep haber etile yazıda.
Teşkilâtçılarnıñ aytqanlarına köre, film numayışından soñra Skype vastası ile film muellifi Nariman Aliyev ve Qırımtatar Milliy Meclis reisi Refat Çubarov ile canlı subet ötkerilecek.
Ukrainanıñ Finlandiyadaki elçihilik sitesinde bu merasim aqqında malümat daa yerleştirilmegen.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
