Qırımda Kefe regional Meclis azası Suleyman Kadırovnıñ evinde oktâbr 5 künü, sabadan Rusiye Federal telükesizlik hızmeti tarafından tintüv keçirile.
Bunı Suleyman Kadırov Facebook saifesinde yazdı.
«Mende şimdi FSB tintüv keçire, lâqayd qalmağanlarğa yanımda olmaqnen meni desteklemege rica etem! Kefe, Garneva soq., №36 ev», – dep yazdı Kadırov.
Kadırıvnıñ evinde keçirilgen tintüv aqqında malümatnı Qırımtatar Milliy Meclis reisiniñ birinci muavini Nariman Celâl da tasdiqladı.
«Tasdiqlayım. Suleyman ağa özü telefonğa cevap bermey, bizim ballar şimdi onıñ yanına baracaqlar», – dedi Celâl.
Qırımnıñ işğalinden soñ mustaqil jurnalistler, qırımtatar faalleri ve Meclis azalarında sıq-sıq tintüvler keçirilip başlandı. Ukrainı Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunen beraber TİN Dünya toplulığına muracaat etip, bütün mumkün olğan siyasiy ve uquqiy çareler ile Rusiyege tesir etmege, onıñ totalitar usullarnen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
