Qırımtatar Milliy Meclisiniñ işğal olunğan Qırımda Rusiye Yüksek mahkemesi tarafından yasaq etilmesi qırımtatarlarnı toplu şekilde cezalanacaqlarını añlatmaqtadır. Bu aqta Türkiye Tışqı işler naziriginiñ sitesinde yerleştirilgen beyanatta söz yürsetile.
«Rusiye Federatsiyası Yüksek Mahkemesiniñ, itirazlar üzerine alğan yasaqlama qararı teessüf ile qarşılanğandır», – dep buyurıla beyanatta.
«Qanuniy talaplarını er zaman demokratik ve barışıq usullarnen ortağa qoyğan, muabbetlik, tınçlıq içinde, kendilerini serbest şekilde ifade etip olacaqları bir ayat keçirmekten başqa maqsatları olmağan Qırımtatarlarınıñ, toplu cezalandırma añlayışını akis etken bu tür usullarnen basqı altına alınmaq istenmesi çoq kederledricidir», – dey Türkiye Tışqı işler nazirigi.
Beyanatta ayrıca Türkiye «oğratılğanları bu basqılar qarşısında Qırımtatarlarını desteklemege devam etecegi» de qayd etile.
Rusiyege bağlı olğan Qırım Yuqarı Mahkemesi aprel 26 künü Meclisniñ areketini toqtatmaq qararını alğan edi. Dünya toplulığı rus akimiyetiniñ böyle faaliyetine qatiyen qarşı çıqtı. Meclisniñ imayesi Rusiye Yuqarı Mahkemesine şikâyet arizasını yollağan edi.
Sentâbr 29-da Rusiye Yuqarı Mahkemesi şikâyet arizasına cevap olaraq, Qırımtatar Milliy Meclis areketiniñ yasaqlanmasını tasdiqladı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
