Rusiye tarafından işğal etilgen Qırımda 400 biñ sakinniñ qulana bilecegi yañı suv ağını quracaq olalar. Bunı Rusiye nezareti astındaki Qırım Ekologiya ve tabiat resursları nazirliginiñ matbuat hızmeti bildire.
Müessisede suv ağınıñ qurucılığı ende başlanğanını söylediler, lâkin qurucılıq işleri ne vaqıt yekünleneceklerini açıqlamadılar.
«Suv ağı qurulsa, şarqıy Qırımnıñ 400 bin sakini kün devamında 195 biñ м3 köleminde içmek ve hocalıq işlerinde qullanmaq içün suv alıp olacaq», – dep aytıla beyanatta.
Rusiye Qırımnı zapt etken soñ Ukraina yarımadanı Dnepr özeninen birleştirgen Şımaliy-Qırım ağından suvını kesti. Qırımnıñ 85% istimalını bu ağ vastası ile Ukraina qapata edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
