Link açıqlığı

Qırımda mahkeme Mauşev içün toplaşuvnı onıñ ana tilinde keçirmege istemedi – Smedlâyev


Mustafa Mauşev

Rusiye kontrolü astındaki Bağçasaray mahkemesi Qırımtatar Milliy Meclis azası Mustafa Mauşev içün toplaşuvnı onıñ ana tilinde keçirmege razı olmadı.

Mahkemeniñ böyle qararı aqqında Qırımtatar Milliy Qurultaynıñ Merkeziy saylâv komissiya reisi öz Facebook saifesinde yazdı.

«Makemeci Atamanük German Stepanoviç mahkeme toplaşuvını qırımtatar tilinde keçirmege razı olmadı, böylece Qırım Konstitutsiyasınıñ 10 maddesini ve RF Cinaiy-protsessual kodeksiniñ 18 maddesini körmemezlikke urdı!» – dep yazdı Smedlâyev.

Mauşevniñ işi boyunca mahkemeniñ nevbetteki toplaşuvı oktâbr 20 kününe belgilendi.

Mustafa Mauşevni maküm etmege istegenlerniñ sebebi, o İlmi Umerov psihiatrik hastahaneden çıqarılğan soñ onı ziyaret etkeni ve Milliy Meclis reisi Refat Çubarovnı doğğan künü ile hayırlağanıdır.

Ukrainı Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunen beraber TİN Dünya toplulığına muracaat etip, bütün mumkün olğan siyasiy ve uquqiy çareler ile Rusiyege tesir etmege, onıñ totalitar usullarnen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG