Qırımda oktâbr 3 künü elektrikniñ olmağanına sebep – Krasnodar vilâyeti ve Qırım arasındaki magistral elektrik ağlarında tamir işleriniñ alıp barılması oldı. Qırım sakinleri içün plandan tış vaqıtınca energiya aqımı toqtatıla edi, dep haber ete Kremlge tabiy olğan «Krımenergo».
«Nevbetçi-dispetçerniñ emirinen «KrımEnergo» teşkilâtı dizel generatorları köçürildi, böylece elektriksiz qalğan qullanıcılarnıñ sayısı azlaştı», – dep aytıla beyanatta.
Matbuat-hızmetiniñ malümatına köre, saat 21:22 «Qırımda er kesge elektrik aqımı berildi».
Bundan ögüne oktâbr 3 künü Yaltanıñ yerli sakinleri nevbetnen ışıqtan söndürülgenleri aqqında haber ettiler. Elektrikniñ kesilmesi Keriçte de qayd etile edi.
İşğal etilgen Qırımğa keçken yılnıñ soñunda Urainadan elektik aqımı kesilgen soñ, qomşu Rusiyeden yarımadağa energo-köpür qurulıp başlandı, ve onıñ işke tüşürülmesi aqqında beyanatlar seslendirilgen soñ o sıq-sıq bozula edi. Yarımadada qazaiy ışıq söndürüvleri sıq yüz bere.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
