«Skit altınları» boyunca mahkemeden aqsız çıqacaq taraf Amsterdamdaki Allard Pierson adına muzeyge eksponatlarnıñ saqlanılması içün töleycek. Bunı Kyivte matbuat konferentsiyası devamında Ukraina Medeniyet naziriniñ birinci muavini Svitlana Fomenko bildirdi.
«Mesele şunda ki, şimdi olar Amsterdamdaki muzeyniñ anbarında saqlanıp tutılalar. Mahkeme işi baqılacaq muddet devamında, bes-belli, bu emanet bedava saqlanılmay. Bu sebepten, davada yuttırğan taraf, saqlanuv içün tazminatnı ödemek mecbur olacaq», – dedi o.
2014 senesi fevral-avgust aylarında Amsterdam şeerindeki Allard Pierson adına muzeyde «Qırım – Qara deñizde altın ada» adlı sergi keçirile edi. Onda Qırımdaki dört muzeyden alınğan, Qırımda skitler, sarmatlar ve gotlarnıñ medeniyetini taqdim etken eksponatlar numaiş etile edi.
Qırım işğalinden soñ ukrain akimiyeti, tarih eserleri muzeylerniñ malı degil de, Ukrain devletiniñ mülkine ait olğanını beyan etti. Öz nevbetinde Qırımdaki muzeyler degerliklerniñ olarğa qaytarılmasını talap ettiler. Bu arada Hollanda muzeyi, bilgili mahkemeniñ qararı olmağance ya da eki taraf añlaşmağance, eksponatlarnı ne Ukrainağa, ne de Qırımğa yollamamağa qarar aldı.
Qırımdaki dört muzey Amsterdam mahkemesine Allard Pierson adına muzeyge qarşı toplu şikâyet yollap, kollektsiyanı Qırımğa qaytarmağa talap etti. Bu iş boyunca mahkeme toplaşuvı oktâbr 5 künü ötkerilecek.
