Qırımdaki cemaat faaliyetçisi Aleksandr Talipov Qarasuvbazar rayonında rus ordusına çağıruv kampaniyası bu küzde bozulmaq mümkün olğanını haber ete.
Onıñ sözlerine köre, anda alâ daa çağıruvnıñ tıbbiy teşkerüv komissiyası tizilmedi ve onıñ terkibi tainlenmedi.
«Çağıruvğa qarşı doğrudan-doğru sabotaj ve keder yapıla. Qarasuvbazarnıñ arbiy komissarı defalarca Qarasuvbazar rayonnıñ merkeziy hastahane baş-ekimi O.Y. Poklonskayağa muracaat etkenine baqmadan, o alâ daa komissiya azalarını teklif etmey ve reisni tainlemey», – dep yaza Talipov öz Facebook saifesinde.
Yazğanını isbatlamaq içün o Rusiye tarafından tainlengen Qarasuvbazar rayonındaki Qırım boyunca arbiy komissariatnıñ bölük mudiri tarafından baş-ekimge yazğan muracaatnı yerleştire.
Cemaat faali qayd ete ki, çağıruv komissiyası öz işini oktâbr 3 künü başlamaq kerek edi, lâkin yer alğan vaziyet sebebinden çağıruvnıñ planları kerçekleşmeycektir.
Talipov şuña da diqqat çeke, Olga Poklonskaya 2014 senesi mart ayında keçirilgen «Qırım qadınları cenkke qarşılar» adlı numaişte iştirak ete edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
