Ukraina Yuqarı Rada Yolbaşçısı Andriy Parubiy deputatlarğa Rusiye ile vizalı rejimnı kirsetmek meselesini baqmağa teklif ete.
«2016 senesiniñ başında men Ukraina akimiyeti ve Rusiye akimiyeti arasındaki Ukraina ve Rusiye Federatsiyasınıñ vatandaşları vizasız seyaat ete bilecekleri aqqında añlaşmanı lâğu etmek muracaatınen Ukraina Nazirler Şurasına buyurmaq leyhasını Yuqarı Radağa kirsetken edim. Belki de, bu meseleni kötermek ve Rusiye ile vizalı rejimni kirsetmeğe doğru olur», – dedi ukrain spikeri oktâbr 3 künü, fraktsiya, komitet ve gruppa yolbaşçılarınıñ uyğunlaşuv meclisi devamında.
Bunen beraber o Rusiyege qarşı sanktsiyalarnıñ arttırılmasını da deputatlarğa muzakere etmege teklif etti.
Bundan evel malüm olğanı kibi, Rusiyeniñ paytahtı Moskva şeerinde «Ukrinform» ukrain agentliginiñ muhbiri Roman Suşenko mahkeme qararınen eki ayğa apiske alındı. Rusiyeniñ Federal telükesizlik hızmeti onı casuslıqta qabaatladı ve muhir «Ukraina Mudafaa nazirliginiñ İstihbarat baş merkeziniñ polkovnigi» olğanını aytqan edi.
Ukraina Tış işler nazirliginiñ matbuat-kâtibi Maryana Betsa bildirdi ki, TİN bu arada Roman Suşenkonıñ Moskvada yaqalanğanınen bağlı malümat toplay, ve ukrain konsulları onı ziyaret etmeleri içün tedbir ala.
Muhbirniñ ailesi ve «Ukrinform» tarafından yapılğan muracaat ile muhbirniñ aqlarını advokat Mark Feygin qorçalaycaq. O «Lefortovo» apishande Suşenko ile körüşmek içün izin berilecegini bekley.
Roman Suşenko «Ukrinfom» heber agentliginde 2002 senesinden berli çalışa, 2010 senesinden berli agentlikniñ Frenkistandaki mahsus muhbiri edi.
