Link açıqlığı

Sentâbr 30, Cuma künü daa altı Meclis azasına memuriy qanun bozuvları aqqında protokollar elge tuttırıldı. Mesele Rusiye Memuriy qanun bozuvlar Kodeksiniñ 20.28 maddesi «Areketiniñ toqtatılması aqqında qarar alınğan cemaat ya da diniy teşkilâtınıñ işini teşkil etüvi».

Bunı «QirimInfo» sitesine Milliy Meclis reisiniñ birinci muavini Nariman Celâl bildirdi.

«Bügün altı Meclis azası Aqmescitte ekstremizmge qarşı kureş Merkezinde oldılar. Bundan ögüne olar memuriy qanun bozuvları aqqında protokollar aldılar. Daa üçü – barmadı. Ekisi, malüm olğanı kibi, endi maküm etilgenler», – dey Celâl.

Sentâbr 29 künü «E» merkezine çağırılğanı aqqında Meclis azası Emine Avamileva bildirdi.

Advokat Cemil Temişevniñ sözlerine köre, kelecek afta bu işler boyunca mahkeme oturışı keçirilecek ve qararlar alınacaq.

«Subetke beş-altı adam çağırıldı. Olarğa qarşı protokollar azırlanıldı. Mahkeme toplaşuvı oktâbr 4, Salı künü saba keçirilecek», – dedi Temişev.

Sentâbr 28 künü Qırımtatar Milliy Meclisi reis muavini İlmi Umerovğa rusiyeli mahkeme 750 ruble para cezasını belgiledi.

Sentâbr 27-de Qırımtatar Milliy Meclisi azası Ali Hamzinge, «Rusiyede yasaq olğan cemaat birleşmesiniñ toplaşuvında iştirak etkeni içün», rusiyeli Qırım mahkemesi1000 ruble para cezasını belgiledi.

Sentâbr 26-da Qırımtatar Milliy Meclis azaları, bunen beraber, Qırımtatar Qurultayınıñ bazı delegatları Aqmescitteki Ekstremizmge qarşılıq boyunca merkezge çağırıldı.

Nariman Celâlnıñ bildirgen malümatına binaen, bir qaç insan körüşüvge razı oldı, digerleri ise, resmiy vesiqanı beklemekni sayladı.

«Uquq qoruyıcılar Meclis azaları Ablayev Emirali, Yakubov Ruslan ve Ayder Acımambetovnıñ vekâletleri toqtatılğanı, bunen beraber, soñkisiniñ Meclis reisi muavini vazifesinden boşatılması aqqında yaqında qabul etilgen Meclisniñ qararlarınen meraqlana», – dep yazdı Celâl Facebook saifesinde.

XS
SM
MD
LG