«Mustafa» filminiñ muellifi Ahmed Sarıhalil qırımtatar halqınıñ lideri aqqında film oktâbr ayında Kyivte «Molodost» festivalinde taqdim etilecek.
Sarıhalil «QirimInfo» sitesine intervyüda filmniñ süjetini añlattı.
«Biz Mustafa Cemilevniñ hayatında yüz bergen esas vaqialar aqqında tarif etmege qarar aldıq: sürgğnlik, onıñ ilk kere apiske alınması, açlıq. Qararlaştırıp, bu yoldan kettik. Oña köre Vahtang Kipiani (tarihçi ve jurnalist – QA) filmniñ qaramanlarından intervyü alğanda çalıştı. Mustafa ağanıñ öz ayat ikâyesini esas etip aldıq. Onnen şahsen tanış olğan adamlar: dissident, uquq qorçalayıcılarnıñ hatıravlarını bu ikâyeden keçirdik. Filmde kadr arqasından oqulğan metinler qullanılmadı, bu sebepten ikâyeni qaramanlar tarif etmek kerek edi», – dey rejissör.
«Mustafa» – Mustafa Cemilev aqqında vesiqalı film. Maqsadı – cemaatçılıqqa qırımtatarlarnıñ küreşini, ar-namus, menligini aks etken ukrain siyasetçisiniñ canlı tarihı aqqında tarif etmek. «Mustafa» leyhası üzerinde prodüser, «KrımSOS» cemaat teşebbüsçisiniñ tesisçisi ve koordinatorı Tamila Taşeva, ukrain bestekârı, pianinocı, sound-prodüser Fima Çupakin, ukrain jurnalisti, publitsist, tarihçı Vahtang Kipiani çalıştılar.
