Rusiyeli mahkeme Hayser Cemilevge – qırımtatar halqınıñ lideri Mustafa Cemilevniñ oğluna – üç yıllıq memuriy nezaret astında bulunmasını belgiledi.
Sentâbr 15-te qabul etilgen qarar aqqında Nikolay Polozov onıñ tarafından imaye etilgen kişini Astrahanda ziyaret etken vaqtında bildi.
«Sentâbr ortasında Hayser Cemilev boyunca nasıl «sırlı mahkeme» keçkeni belli oldı. Oña üç yıllıq memuriy nezaret astında bulunması belgilendi», – dep bildirdi Polozov Facebook saifesinde.
Çıqarılğan qararğa binaen, Hayser Cemilevge Qırımdan tış çıqmaq, işnen bağlı olğan vaziyetten ğayrı, saat 22.00-den saba saat 6.00-ğa qadar Bağçasarayda yaşağan yerinden tış bulunmaq, meyhane, qavehane, restoran ya da içkicilik yerlerinde bulunmaq yasaqtır. Cemilevniñ oğlu ayda eki kere «yaşağan yeri ya da qayd etilgen yeri boyunca içki işler organına» kelmek kerek.
Polozov Facebook saifesinde qayd etken mahkemeciniñ hatası aqqında aytsaq, qararnıñ birinci şeklinde hatalı yazıldı ki, Hayser Cemilevniñ Astrahan vilâyetinden tış çıqması yasaqtır.
Sentâbr 30-da, cuma künü Astrahanda mahkeme Hayser Cemilevniñ şartlı müddetten evel azat etilmesi boyunca şefaat arizasını red etti.
Polozov mahkeme qararına şikâyet etmege niyetlengeni aqqında bildirdi.
Sentâbr 29-da, mahkeme toplaşuvından evel, Polozov haber etti ki, onıñ tarafından imaye etilgen kişi sanki «kün tertibini bozğanı içün» ceza izolâtorına keçirildi.
Aprel 28-de Astrahan vilâyet mahkemesi Cemilevni şartlı müddetten tış azat etmekni red etti.
İyün 23-te Ukraina Adliye nazirliginde bildirdiler ki, müessise İnsan aqları boyunca Avropa mahkemesinde Hayser Cemilevniñ adliyecileri bergen davağa qoşuldı. 2015 senesi iyül 10-da İnsan aqları boyunca Avropa mahkemesi Hayser Cemilevniñ işi boyunca qarar çıqarıp, onı SİZO-dan azat etmege talap etti, bunen beraber, Rusiye Federatsiyasını ukrain kişiniñ sağlığına zarar ketire bilecek areketlerni yapmamağa mecbur etti.
Hayser Cemilevni 2013 senesi mayıs 27-de onıñ Bağçasaraydaki evinde yaqalap, o yerde 44 yaşındaki Fevzi Edemovnı babasınıñ tüfeginden öldürgeninde qabaatladılar. Qırım işğal etilgen soñ rusiyeli taqiqat organları onıñ işini yañıdan baqmağa qarar aldı. Hayserni Aqmescit apishanesinden çıqarıp, Krasnodar vilâyetine alıp kettiler.
Rusiye Federatsiyasınıñ Yuqarı mahkemesi Krasnodar ülkesiniñ mahkemesi Hayser Cemilevge bergen 5 yıllıq apis cezasını bir buçuq yılğa qısqarttı. Kiyevniñ Dnepr mahkemesi 2015 senesi aprel ayında onı 3 yıl ve 8 ayğa qadar apiske almağa qarar aldı.
Hayser Cemilev 10 sanlı Astrahan apishanesinde buluna.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
