Link açıqlığı

Saatnıñ esas haberi

Büyük Britaniya elçisi Meclisniñ yasaq etilmesi aqqında: Rusiye, insan aqlarını ürmet etmeli


Moskvada Meclis yasaqlanması boyunca keçirilgen mahkeme vaqtında Maydanda aktsiya
Moskvada Meclis yasaqlanması boyunca keçirilgen mahkeme vaqtında Maydanda aktsiya

Ukrainada Büyük Britaniya elçisi Judit Gof Qırımtatar Milliy Meclisniñ yasaq etilmesini tasdıqlağan Rusiye Yuqarı mahkemesiniñ qararından qasevet çekkenini bildirdi.

«Qanunsız işğal etilgen Qırımda qırımtatar Meclisini yasaq etken Rusiye Yuqarı mahkemesiniñ qararından qasevetlenem. Rusiye insan aqlarını ürmet etmek mecbur», – dep yazdı Gof Twitterde.

Rusiyege boysunğan Qırım Yuqarı mahkemesi aprel 26-da Meclisniñ işğal etilgen yarımada territoriyasında faaliyetini yasaq etti. Dünya toplulığı rusiyeli ükümetniñ böyle areketlrine qarşı qattı narazılıq bildirdi. Meclisniñ imayesi Rusiye Yuqarı mahkemesine şikâyet arizasını yolladı.

Rusiye Yuqarı mahkemesi sentâbr 29-da, şikâyet arizasına cevap olaraq, Qırımtatar Milliy Meclisiniñ faaliyeti yasaq etilmesini tasdıqladı.

Ukraina Tışqı işler nazirligi Meclisniñ Rusiyede yasaq etilecek alda, müessise «qattı cevap» berecegini ilân etken edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG