Link açıqlığı

Sentâbr 29-da, Rusiye Yuqarı mahkemesi Qırımtatar Milliy Meclisiniñ taqdiri boyunca qarar alğan kün, dünyanıñ bir sıra devleti Ukraina tamır halqınıñ temsilci organına destek aktsiyasına qol tuttı. Böyle etip, Qazahistanda Ukraina elçiligi diplomatları soqaqqa ukrain bayrağınen ve qırımtatarlarğa destek köstergen levhaçıqlarnen çıqtı. Latviya elçiligi, ukrain bayrağınen beraber, qırımtatar bayrağını tikledi. Finlandiya paytahtı Helsenki şeerinde faaller rusiyeli elçilik qorasına qırımtatarlarnıñ genotsidini toqtatmaq muracaatınen levhalarnı astı.

Sentâbr 29-da Kiyevde Mustaqillik Meydanında Qırımtatar Milliy Meclisine destek aktsiyası keçirildi. Bu yerde onlarca insanlar toplaştı, olarnıñ arasında uquq qoruyıcılar, Meclis azaları, ukrain deputatları, cemaat erbapları bar edi.

Sentâbr 29-da, cumaaqşamı künü saat 11.00-de Rusiye Yuqarı mahkemesinde «Qırımtatar Milliy Meclisi» cemaat birleşmesi faaliyetiniñ yasaq etilmesi aqqında» işi boyunca, «Ekstremistik faaliyetke qarşılıq aqqında» Federal Qanunnıñ 25.07.2002 qabul etilgen 1145-FQ sanlı 9-cı maddesine esaslanıp, toplaşuv keçirile.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG