Sentâbr 30-da, cuma künü, 50 kilogrammlıq aviabomba zararsız alğa ketirilecek vaqıt, Aqmescit-Aqyar Elektrik ağı şeritiniñ söndürilmesi planlaştırıla. Bu aqta Aqyarda Fevqulade vaziyetler nazirligi rusiyeli idaresiniñ matbuat hızmeti bildire.
«50 kilogrammlıq aviabomba qurulğan Aqyar TES-2 yanında tapıldı. Bu topraq sarımğa alınacaq. Telükeli tapılmanıñ sentâbr 30-da zararsız alğa ketirilmesi planlaştırıla. İşler saat 9.00-dan başlanacaq», – dep aytıla beyanatta.
Matbuat hızmetiniñ bildirgenine köre, «SD-50» almaniyalı bombası topraqta Ekinci cian cenki zamanından berli tura ve topraq işleri alıp barılğan vaqıtta tapıldı. Tehnikiy sebeplerden, pirotehnika hızmetiniñ hadimleri onı bu yerde zararsız alğa ketirmege qarar aldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
