Link açıqlığı

Keçken senege köre, Qırımda raatlanğan balalarnıñ sayısı 10 fayızğa arttı, olardan tahminen 60%-ı Rusiye sakinleri ola. Bu aqta Qırım mühbirlerine Qırımda Rospotrebnadzor yolbaşçısı, yarımada baş devlet sanitar ekimi Natalya Penkovskaya bildirdi.

«Bu sene Qırımda Rusiye Federatsiyasınıñ bütün subyektlerinden 117 biñ bala raatlandı ve tedaviylendi. Cumhuriyet büceti parasından tedaviylenüvge 300 milliondan ziyade ruble ve belediye bücetlerinden 83 million ruble ayırıldı. Bu, 2015 senesi yazğa köre, eki qat ziyadedir. Aqyar boyunca ayırılğan para, 2015 senesine köre, azca oldı, 97 million», – dep bildire Penkovskayanıñ sözlerini «RİA Novosti Krım» agentligi.

2016 senesi iyün ayında bildirilgen malümatqa binaen, keçken sene Qırım Sağlıq saqlav nazirliginiñ şifahanelerinde 45 biñ insan tedaviylenüvden keçti, olardan 26 biñden ziyade – bala, bu cümleden, 18 biñ – bedava tedaviylenüvden keçken Qırım sakinleridir.

Bu sene Qırım lagerlerinde aman-aman 4 biñ balanıñ tedaviylenüvden keçirilmesi planlaştırılğan edi. Umumen olaraq, yarımadada yaz tatili vaqtında 180 biñ bala içün raatlıq ve tedaviylenüv teşkil etilecek edi.

Qırımda balalarnıñ raatlığı ve tedaviylenüvine bu sene bütün seviyeli bücetlerden yarım milliard ruble sarf etilmesi planlaştırılğan edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG