Link açıqlığı

Qırım siyasiy mabuslarına yardım fondu, qaysı birini şimdiki vaqıtta Kiyevde teşkil etmek içün çalışalar, Rusiye territoriyasında çalışıp olamaz, çünki rusiyeli ükümet er angi farqlı fikirni basmağa tırışa. Böyle fikirni Qırım.Aqiqat Radiosınıñ saba yayınında rusiyeli adliyeci Mark Feygin bildirdi.

«Bu teşkilâtlar (kraudfanding – QA) aqiqaten yasaqtır. O (teşkilât – QA), teşkil etilse, onıñ esabı birden blok etilecektir. Ve bunıñ içün, elbet, bu şeylerge para ayıracaq konkret sponsorlarnıñ peyda olmasını ister edik», – dep ayttı Feygin.

Mark Feygin, Qırım siyasiy mabuslarına yardım fondunı Ukraina territoriyasında cemaat teşkilâtı olaraq qayd etmege teklif ete.

«Böyle Fondnıñ, cemaat fondu olması kerek, bu yerde fondnıñ şurası olması kerek, onıñ terkibine adliyeciler, uquq qoruyıcılar, em de ayrı müim meseleler boyunca qabaatlanğanlar kirmeli. Ve olar, ne qadar ve nasıl para cıyılğanını, nasıl tarqatılğanını, mümkün olsa, halqqa bildirip, belgilemek kerek», – dep qayd etti o.

İşğalden soñ Qırımda mustaqil mühbirlerde, qırımtatar faallerinde ve Meclis azalarında kütleviy tintüvler sıq-sıq keçirilip başladı. Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG