Vinnitsada Qırımtatar-ukrain medeniy merkeziniñ zemaneviyleştirilmesi boyunca işler içün 2 million grivna kerek olacaq.
Bu aqta Qırım.Aqiqatqa leyha idarecisi Taisa Gayda bildirdi. Onıñ sözlerine binaen, bu tahminiy fiyattır, tam miqdar leyha işleri bitirilgen soñ belli olacaq.
«Leyha-fiyat vesiqalarınıñ azırlanılmasına para ayırğan metsenat tapıldı, leyha endi işletile, bundan soñ tam fiyatnı aytmaq mümkün olacaq», – dedi Gayda.
Onıñ qayd etkenine köre, laf «Eski şeer» qasabasındaki baqımsız qalğan bina aqqında kete, evel onıñ bir qısmında kvartal komiteti yerleşken.
Qırım işğal etilgen soñ Vinnitsa vilâyetine köçken ve bu yerde «Vetan» birleşmesini teşkil etken qırımtatar cemiyetiniñ temsilcileri sentâbr 27-de, salı künü keçirilgen matbuat konferentsiyasında yaqın künlerde bina kirası aqqında vesiqanı imzalamağa niyetlengenleri aqqında bildirdi.
«Bu afta Vinnitsa şeer şurası ile bina kirası aqqında vesiqalar imzalanmaq kerek, olar artqa bermesin dep, bu aqta ilân etmek qararını aldıq», – dep qoştı Gayda.
Gaydanıñ qayd etkenine köre, söz bina kirası kiçik fiyatqa berilecegi aqqında yürsetile. Onıñ fikrince, tahminen 500 kvadrat metrni teşkil etken binada tamir işleriniñ yapılmasına bir yılğa yaqın vaqıt kerek olacaq.
«Vetan» teşkilâtı ve Vinnitsa şeer şurası icra komiteti arasında Qırımtatar medeniy merkezi içün binanıñ ayırılması aqqında muzakereler 2014 senesi küzde başlandı.
2014 senesi mart ayından başlap, Vinnitsa ve Vinnitsa vilâyetine bir qaç yüz qırımtatar kelip, yerleşti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
