Soñki vaqıtları Rusiye halqara seviyede Qırım işğalini qanunlaştırmaq içün er angi imkânlarnı sıq-sıq qullana, dep bildirile Büyük Britaniyadaki Ukraina elçiliginiñ Facebook saifesinde.
Hususan, elçilikniñ malümatına binaen, Büyük Britaniya vatandaşı Julan Burdocknıñ («JB and 24 kopeks» gruppası) avgust 26-28 künleri işğal etilgen Qırımda keçirilgen «Koktebel-Jazz Party» halqara festivalinde iştirak etkeni belgilendi.
Bundan da ğayrı, diplomatlarnıñ qayd etkenlerine köre, Qırımda yerleşken Mriya Resort & Spa oteli World Travel Awards (London) halqara mükâfatını aldı.
Büyük Britaniyadaki Ukraina elçiligi bildire ki, qayd etilgen merasimlerniñ teşkilâtçıları ve iştirakçilerine, bunen beraber, Büyük Britaniya ükümetine, resmiy olaraq muracaat etip, işbu areketlerni takbih etti.
Bunen beraber, müessisede kelecekte bu kibi vaqialar, bu cümleden, Avropa birligi tarafından Rusiyege qarşı kirsetilgen sanktsiyalarğa ve Ukraina qanunlarına zıt kelgen vaqialar aqqında haber etmege çağırdılar.
«Diplomatik müessisemiz tarafından kelecekte idare etüv maqsadınen britaniyalı vatandaşlar ya da teşkilâtlarnıñ iştiraginen olğan bu kibi sizge belli olğan vaqialar aqqında elçilikke (elektron adresi: emb_gb@mfa.gov.ua) haber etmeñizni rica etemiz», – dep qayd ettiler müessisede.
Sentâbr 22-debüyük Britaniyada Ukraina elçisi Natalya Galibarenko bu devletniñ ükümetini britaniyalı vatandaş Grem Filipske qarşı, onıñ «Ukrainada Rusiye işğalci ükümetiniñ menfaatlarında teşviqat faaliyetini» toqtatmaq içün, mütenasip tedbirler keçirmege çağırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
