Kreml tarafından idare etilgen Qırım parlamentiniñ reisi Vladimir Konstantinov «Ay-Petri dağ töpesinde bozuvlarnen ticaret obyektlerini qoyğan» iş adamlarınıñ areketlerini takbih etti. Bu aqta o, Qırım ükümeti toplaşuvında ilân etti, dep bildire müessiseniñ matbuat hızmeti.
Onıñ sözlerine binaen, iş adamlarınıñ bazıları, Ay-Petri dağ töpesinde ticaret-eglence obyektlerini qoyıp, «öz yatırım mecburiyetlerini pek boza».
«Körüne ki, yatırımcılar topraqnıñ inkişafına para ayırmağan edi, birinci basamaqta öz mecburiyetlerini yerine ketirse ediler, territoriyanıñ vaziyeti başqa olur edi», – dep ilân etti Konstantinov.
Bunen beraber, o qayd etti ki, tender keçirip, «tabiatqa zarar ketirgen ve turistlerniñ Qırımğa merağına menfiy tesir etken areketler yapqan insafsız iş adamlarını deñiştirmek» kerek.
Mayıs 10-da adliyeci Emil Kurbedinov, rusiyeli uquq qoruyıcılar tarafından keçirilgen Ay-Petri dağ töpesinde ticariy noqtalarınıñ teşkerilmesi aqqında bildirgen edi.
Onıñ sözlerine binaen, reydnı silâlı adamlar keçirdi, satıcılarnıñ bazılar, hususan, qırımtatarlar, ticaretni qapatıp, ketmege mecbur oldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
