«QırımSOS» cemaat teşebbüsiniñ faalleri ve qırımtatar milliy areket iştirakçileri Kiyevde Rusiye elçiligi binası yanında Qırımda belgisiz ğayıp olğanlarğa destek aktsiyasını keçirdi.
Qırım.Aqiqat mühbiriniñ bildirgenine binaen, aktsiyağa kelgen faaller, ellerinde yarımadada zorbalıqnen ğayıp oluvı qurbanlarınıñ adları ile levhalarnı tutıp, elçilik yanında sırağa turdı.
Aktsiya çerçivesinde iştirakçiler Rusiyeden Qırımda işğalden başlap bugünki künge qadar ğayıp oluv vaqialarınıñ taqiq etilmesini talap etti.
Miting soñunda faaller rusiyeli elçilik qorasına belgisiz ğayıp olğanlarnıñ adlari yazılğan beyaz şeritlerni taqtı. Olarnıñ añlatqanlarına binaen, bu, qaçırılğan insanlar bir vaqıt tapılacağına ümütni temsil ete.
Rusiyege boysunğan Qırım prokurorı Natalya Poklonskaya qayd ete ki, yarımadada 357 insannıñ bulunma yeri belgilenmegen, olardan 188 kişi belgisiz ğayıp oldı ve 169 adamnıñ soy-soplarınen bağı üzüldi. Qayd etilgen raqamdan 26 insan – qırımtatardır.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
