Rusiyeli Qırım prokurorı Natalya Poklonskaya vazifeden boşatılma aqqında ariza yazdı. Bu aqta o, RİA Novosti agentligine bildirdi.
«Bugün, vaqtınca ve Devlet Dumasına saylanılğanım sebebinden, meni Qırım cumhuriyeti prokurorı vazifesinden boşatsınlar dep, ariza yazdım», – dep ayttı Poklonskaya agentlikke.
Onıñ sözlerine binaen, ariza endi Rusiye Baş prokuraturasına yollanıldı.
«Devlet Duması deputatı olaraq saylanılğanım sebebinden, vekâletim toqtatıla, ve men Qırım prokurorı vazifesinden boşatılam ve saylanılğan vazifege keçem. Stajım prokuror olaraq saqlana, amma deputat vazifesini eda etem ve çalışam, çünki bu, saylanılğan bir vazife», – dep qayd etti Poklonskaya.
Sentâbr 18-de, bazar künü Rusiyede Devlet Dumasına saylavlar keçirildi. Moskva rey berüvni işğal etilgen Qırımda da keçirmege qarar aldı, bunı ise, Kiyev ve bir sıra Ğarp devletleti qattı tenqit etti.
Partiya cedvelleri boyunca Dumağa Kremlge boysunğan Qırım baş nazir muavinleri Mihail Şeremet ve Ruslan Balbek, bunen beraber, Qırımnıñ rusiyeli prokurorı Natalya Poklonskaya keçti.
İşğal etilgen yarımadada «Yedinaya Rossiya» firqasınıñ başında olğan Rusiye tarafından tayinlengen Qırım yolbaşçısı Sergey Aksönov deputatlıq mandatından vazgeçti.
Ukraina Yuqarı Radası sentâbr 20-de «Ukraina Rusiye Federatsiyası yedinci çağıruv Federal Toplaşuvı Devlet Dumasına saylavlarnıñ, bunıñ neticeleriniñ ve uquqiy aqibetleriniñ, veyedinci çağıruv Federal Toplaşuvı Devlet Dumasınıñ terkibi, vekâleti, qararlarınıñ qanuniy olğanını tanımağanı munasebetinen Ukraina Yuqarı Radasınıñ beyanatı aqqında» qarar leyhasını qabul etti.
