Link açıqlığı

Ukraina, yarımada işğalden azat etilgen soñ, Qırım federal universitetiniñ diplomlarını tanımaz – Cemilev


Mustafa Cemilev Kiyevde Tavriya milliy universitetiniñ tantanalı açılışında

Aqmescitteki Qırım federal universitetiniñ diplomları, yarımada işğalden azat etilgen soñ, Ukraina tarafından tanılmaz, dep ilân etti Mustafa Cemilev Kiyevde Tavriya milliy universitetiniñ tantanalı açılışında, dep bildire Qırım.Aqiqat mühbiri.

«Aqmescitte TMU, Qırım federal universitetine çevirildi, o, öz terkibine yarımadanıñ bir qaç aliy oquv yurtunı aldı. Amma onıñ diplomları, işğalden azat etilgen soñ, Ukraina tarafından tanılmaz», – dep bildirdi Cemilev.

Bunen beraber, o qayd etti ki, universitetniñ faaliyeti Qırım Muhtar Cumhuriyeti içün kadrlarnı azırlamaq içün alıp barılacaq.

«İşğalden azat etilgen soñ, bütün strukturalarnıñ «dezinfektsiyasından» soñ, kadrlar yetmemezligi olur, ve TMU mezunları muhtariyetniñ hocalıq ve iqtisadiy faaliyetini idare etecek», – dep ilân etti halq deputatı.

Mustafa Cemilev bildirdi ki, bu universitet kelecekte Ukrainada eñ prestij olacağı içün elinden kelgenini yapar.

Sentâbr 26-da, bazarertesi künü Ukraina Tasil ve ilim nazirligi binasınıñ toplaşuv salonında Vernadskiy adına Tavriya milliy universitetiniñ tantanalı açılış merasimi keçirildi, oquv yurtu işğal etilgen Aqmescitten Kiyevge keçti.

Tavriya milliy universitetinde derslerni sentâbr 27-de başlanmağa planlaştıralar.

Vernadskiy adına Tavriya milliy universiteti 2016 senesinden başlap, Ukraina qıtaiy qısmında çalışa.

XS
SM
MD
LG