Link açıqlığı

Yuqarı Radada Qırım ile memuriy sıñırdan eşyalarnıñ keçirilmesi qaidelerini deñiştirmege teklif etecekler


Ukrainada Qırım ile memuriy sıñırdan ayrı mahsulat ve hızmetlerniñ keçirilmesi aqqında ukrain Nazirler kabinetiniñ 1035 sanlı qararına tüzetmeler kirsetile bile. Bu aqta Qırım.Aqiqat Radiosınıñ saba yayınında Qırım uquq qoruyıcı gruppasınıñ idarecisi Olga Skripnik bildirdi.

Uquq qoruyıcınıñ bildirgenine köre, cemaatçılar qarardaki bazı maddelerniñ tüzetilmesi içün küreşe. Söz, hususan, vatandaşlar işğal etilgen Qırım ile memuriy sıñırdan keçire bilgen eşyalarnıñ cedvelini sıñırlağan birinci madde aqqında yürsetile.

Olga Skripnikniñ sözlerine binaen, bu işni Ukrainada bürokratik ceryanlar toqtata.

«Memuriy sıñırdan keçirilgen mahsulatnıñ fiyatı da sıñırlanğan. Meselâ, onkologiya ilâcları pek paalı ve bu cedvelge kirmey. Biz ta aprel ayında tüzetüv leyhasını taqdim etken edik, amma bir şey daa deñişmedi... Üç teşkilâttan teklif işğal etilgen topraqlarnıñ naziri ve nazir muavininiñ elinde bar, bunıñ qabul etilecegini bekleymiz. Eñ azdan, bu qararnıñ lâğu etilmesini, ya da adiy vatandaşlarnen ve olarnıñ şahsiy eşyalarınen bağlı olğan birinci maddeniñ tolusınen deñiştirilmesini talap etemiz», – dep qayd etti Skripnik.

Vaqtınca işğal etilgen topraqlar meseleleri boyunca nazir muavini Yusuf Kurkçı añlattı ki, nazirlik, uquq qoruyıcılarnen işbirlik tutıp, çalışa.

«Bunıñ tez şekilde yapılması içün elimizden kelgenini yaparmız ve teklif etkenimiz bütün qanun paketi Nazirler kabinetinden keçmeycek te, bu Yuqarı Radada qanunnıñ tüzetilmesi olacaq. Bu saada azırlıq işlerimiz endi alıp barıla. Fraktsiyalar, deputatlar, deputatlar gruppaları ile çalışma saasında. Yuqarı Radada añlayış bar. Lâkin, qanun leyhası bütün meraqlanğan müessiseler tarafından tasdıqlanmaq kerek, bu seviyede keçikme ola bile», – dep añlattı Kurkçı.

2015 senesi sentâbr 20-de Qırımğa mahsulat ve malnı alıp ketken yük naqliyatını blok etüv boyunca qırımtatarlarnıñ liderleri teşebbüsinen keçirilgen müddetsiz aktsiyası başlanğan edi. 2016 senesi yanvar ayı ortasında, teşkilâtçılarnıñ aytqanına köre, Qırım qamaçavı aktsiyasınıñ şekli deñişti.

2016 senesi yanvar 17-de Ukrainada Qırım ile memuriy sıñırdan ayrı mahsulat ve hızmetlerniñ keçirilmesi aqqında Nazirler kabinetiniñ 1035 sanlı qararı işke tüşürildi.

Qararda qayd etile ki, Qırım ile memuriy sıñırdan tek şahsiy eşyalarnı keçirmek mümkün olacaq. Vesiqada, neler ve ne qadar keçirile bilgeni aqqında tafsilâtlıca yazılğan.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG