Sentâbr 26-da işğal etilgen Aqyarda bütün raqam ve analog telekanalları söndürilecek. Bu aqta Kremlge boysunğan Aqyar akimiyetiniñ matbuat hızmeti bildire.
Müessiseniñ haber etkenine köre, bu kün teleradioyayınlama donatmalarında profilaktika işleriniñ alıp barılması planlaştırıla.
«Rusiye televizion ve radio yayınlama ağı» (RTRA) malümatına binaen, sentâbr 26-da saat 5.00-ten 14.00-ke qadar Aqyar şeerinde raqam ve analog telekanallarınıñ yayınlaması sıñırlanacaq», – dep aytıla beyanatta.
Müessisede qayd ettiler ki, bu kibi profilaktika işleri Aqyarda plan boyunca yılda eki kere alıp barıla.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
