Rusiye işğal etilgen Qırımda sıñırda havfsızlıq teminleme vastalarını sınap baqmaq içün poligon teşkil etecek. Bu aqta sentâbr 23-te Qırımda keçirilgen Rusiye Devlet sıñır komissiyasınıñ toplaşuvında söz yürsetildi.
TASS agentliginiñ bildirgenine binaen, rusiyeli baş nazir muavini Dmitriy Rogozinniñ sözlerine köre, Rusiye FSB sıñır hızmetiniñ mütenasip razılığı endi alındı.
«Razılıqnen, bu yerde testler keçirmek, sıñırda havfsızlıq teminleme eñ yañı tehnika aletleriniñ, er angi optika aletleriniñ tecribiy qullanuvğa tüşürmek emir berilecek», – dep ayttı Rogozin.
Onıñ sözlerine binaen, mütenasip emirler Rusiye mudafaa-sanayı kompleksiniñ sanayı işhanelerge de berilecek.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
