Sentâbr 24-de Herson vilâyetindeki Geniçesk rayonında Qırım vatandaşliq qamaçavı aktsiyasınıñ 1 yıllığına bağışlanğan bir sıra merasimler keçirilecektir. Bunı Qırımtatar Milliy Meclisiniñ azası Gülnara Bekirova Qırım.Aqiqatqa bildirdi.
Hususan, saat 12-de «Çonğar» kiriş noqtasına alıp barğan yolda Qırım ile memuriy sıñırda ukrain ve qırımtatar timsallerinen avtoyürüş keçirilecek.
Bundan soñ kiriş-çıqış nezaret noqtasında Qırım ile memuriy sıñırğa cayav marş teşkil etilecektir.
Aynı o yerde Meclis reisi Refat Çubarov çıqışta bulunacaq, faaller ukrain ve qırımtatar halqlarınıñ gimnlerini icra etecek, kürreçikler avağa uçurıp yiberilecek.
2015 senesi sentâbr 20-de Qırımğa mahsulat ve malnı alıp ketken yük naqliyatını blok etüv boyunca qırımtatarlarnıñ liderleri teşebbüsinen keçirilgen müddetsiz aktsiyası başlanğan edi. 2016 senesi yanvar ayı ortasında, teşkilâtçılarnıñ aytqanına köre, Qırım qamaçavı aktsiyasınıñ şekli deñişti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
